Një person është vënë në pranga në Tiranë pasi u kap në posedim të armëve të zjarrit dhe kallëpeve të lëndës plasëse, ndërsa gjatë marrjes në pyetje ka pranuar përfshirjen në aktivitet të paligjshëm.
Bëhet fjalë për Urim Metën, i cili sipas burimeve nga hetimi ka pranuar se ishte pjesë e trafikimit të armëve. Në dëshminë e tij para grupit hetimor, ai ka deklaruar se u përfshi në këtë veprimtari për shkak të vështirësive ekonomike.
“Më kapët dhe e pranoj gabimin. Jam marrë me trafikun e armëve sepse kisha nevojë për para. Doja të ndërtoja një shtesë te banesa ime”, mësohet të ketë thënë ai.
Sipas hetimeve paraprake, i arrestuari kishte planifikuar shitjen e armëve dhe municioneve për rreth 4 mijë euro, ndërsa kallëpet e tritolit do të shiteshin me çmim rreth 500 euro secili. Ai ka deklaruar gjithashtu se kishte marrë një porosi përmes një ndërmjetësi dhe se destinacioni i dorëzimit ishte Maqedonia e Veriut.
“Porosinë e kam marrë nga një ndërmjetës dhe nuk e di kush ishte personi që do t’i merrte. Unë do t’i transportoja deri atje. Kam marrë 400 euro paradhënie dhe pjesën tjetër do ta merrja pas dorëzimit”, ka thënë ai gjatë dëshmisë.
Ndërkohë, autoritetet dyshojnë se Urim Meta mund të jetë i përfshirë edhe në raste të tjera të trafikimit të armëve dhe lëndëve plasëse. Hetimet vijojnë për të identifikuar persona të tjerë të përfshirë dhe për të zbardhur plotësisht këtë aktivitet kriminal.
