Sipas mediave greke, kompania AKTOR ka nënshkruar një marrëveshje strategjike me BNI Foundation për bashkëpunim në sektorin minerar në Shqipëri.

Marrëveshja parashikon krijimin e një sipërmarrjeje të përbashkët sipas ligjit shqiptar, ku AKTOR, përmes filialit të saj AKTOR Metal, do të zotërojë 51% të aksioneve, ndërsa BNI Foundation 49%.

Kompania e përbashkët do të merret me kërkimin, zhvillimin dhe shfrytëzimin e burimeve të caktuara minerare, përfshirë depozitat e nikelit dhe metaleve të rralla në zonën e Bilishtit.

Sipas të dhënave, potenciali i vlerësuar i këtyre burimeve arrin mbi 500 mijë ton nikel dhe mbi 25 mijë ton kobalt.

Projekti përfshin ndërtimin e infrastrukturës dhe impianteve për nxjerrjen dhe përpunimin e mineraleve, ndërsa investimi total mund të arrijë deri në 1 miliard euro.

BNI Foundation do të kontribuojë me të drejtat e shfrytëzimit dhe licencat ekzistuese, ndërsa kompania e përbashkët pritet të mbështetet nga kompani amerikane gjatë zhvillimit të projektit.

Megjithatë, realizimi i projektit mbetet në varësi të miratimeve rregullatore dhe zhvillimeve të mëtejshme.