Çmimet globale të naftës kanë rënë ndjeshëm të mërkurën në tregjet aziatike, pasi Presidenti i SHBA-së, Donald Trump, deklaroi se negociatat për t’i dhënë fund konfliktit me Iranin po përparojnë.

Nafta e papërpunuar Brent ra me 5% në 99.29 dollarë për fuçi, ndërsa nafta amerikane shënoi rënie prej mbi 5.5%, duke zbritur në 88.41 dollarë për fuçi.

Rënia e çmimeve erdhi mes shpresave të investitorëve për një ulje të tensioneve në Lindjen e Mesme, një rajon kyç për furnizimin global me energji.

Trump tha se bisedimet po zhvillohen “tani” dhe se pala iraniane dëshiron të arrijë një marrëveshje, megjithëse këto pretendime janë kundërshtuar nga zyrtarët në Teheran, të cilët i kanë quajtur raportimet për negociata “lajme të rreme”.

Ndërkohë, situata në terren mbetet e tensionuar. Irani dhe Izraeli vazhdojnë të shkëmbejnë sulme me raketa, ndërsa Forcat Mbrojtëse të Izraelit kanë nisur një valë të re sulmesh që synojnë infrastrukturën në Teheran. Paralelisht, Izraeli ka paralajmëruar evakuime në jug të Bejrutit, në kuadër të operacioneve kundër Hezbollahut.

Një zhvillim kyç që ndikoi në tregjet e energjisë ishte deklarata e Iranit se anijet “jo-armiqësore” mund të kalojnë përmes Ngushticës së Hormuzit, me kusht që të koordinohen me autoritetet iraniane dhe të mos mbështesin veprime kundër vendit.

Kjo rrugë detare është jetike për tregtinë globale, pasi përmes saj kalon rreth 20% e furnizimit botëror me naftë dhe gaz natyror të lëngshëm.