Sot në Prishtinë u zhvillua seanca e radhës ndaj Naim Murselit, i akuzuar si porositës i vrasjes së bashkëshortes së tij, Liridona Ademaj. Bashkë me të, për kryerjen e vrasjes akuzohen Kushtrim Kokalla dhe Granit Plava.

Gjatë seancës, Murseli deklaroi se grabitësi kishte kërkuar vetëm telefonat dhe paratë e familjes. Për herë të parë, ai u ballafaqua me trupin e pajetë të gruas së tij, kur trupi gjykues shfaqi fotot si prova, në të cilat dukeshin edhe lodrat e fëmijëve që kanë mbetur pas.

Murseli gjithashtu pranoi se armën, me të cilën sipas Prokurorisë është kryer vrasja, ia kishte blerë Granit Plavës me qëllim që të shitej më pas dyfish. Ai shtoi se nuk kishte përfituar asgjë nga kjo marrëveshje, por vetëm donte të ndihmonte shokun dhe bashkëfshatarin e tij.

Avokati i familjes së dëmtuar kërkoi që pamjet e Liridona Ademajt të mos publikohen dhe që fëmijët e saj të mos kenë qasje në to, duke respektuar dëshirën e familjes.