Qeveria shqiptare ka propozuar rregulla të reja për shfrytëzimin e hapësirave publike, duke vendosur një detyrim të ri për baret, restorantet dhe hotelet: për çdo karrige të vendosur në trotuar, biznesi duhet të mbjellë një pemë.

Sipas projektvendimit të Këshillit të Ministrave, bizneset gastronomike do të mund të përdorin deri në 25% të gjerësisë së trotuarit, por leja do të jetë e vlefshme vetëm pasi të dokumentohet mbjellja e pemëve dhe përmbushja e detyrimeve financiare. Ky rregull do të zbatohet edhe për kioskat.

Rregullorja e re përcakton një kuadër të detajuar për përdorimin e hapësirave publike, duke përfshirë edhe reklamat, aktivitetet tregtare, panairet dhe përdorimin e plazheve. Ndërkohë, ndalohet vendosja e strukturave mbi hapësira të gjelbra dhe përdorimi i zgarave në trotuar pa aspirator.

Aplikimet për leje do të bëhen përmes platformës e-Albania, ndërsa afati i lejes do të jetë 2 vjet, ose 30 ditë për raste të përkohshme si festat.

Në rast shkeljesh, fillimisht jepet paralajmërim, por nëse nuk merren masa, bizneset përballen me gjoba që nisin nga 35.000 lekë për metër katror.

Kjo nismë vjen në kuadër të aksionit për lirimin e hapësirave publike dhe për rritjen e gjelbërimit në qytete, e paralajmëruar më herët.