Policia ka finalizuar operacionin e koduar “Argjendaria” për zbardhjen e një tentative vjedhjeje të ndodhur pak ditë më parë në një argjendari në Pogradec.

Në kuadër të këtij operacioni, janë arrestuar në flagrancë dy të rinj, 23 dhe 22 vjeç, banues në Mamurras dhe Laç, të dyshuar për veprën penale “Vjedhja”, e kryer në bashkëpunim dhe e mbetur në tentativë.

Gjithashtu, është proceduar penalisht edhe një 29-vjeçar, i cili dyshohet se ka kryer veprime për të penguar zbardhjen e plotë të ngjarjes.

Sipas hetimeve, autorët kanë tentuar të vjedhin një argjendari në pronësi të shtetasit L. A., duke dëmtuar qepenin dhe thyer xhamin e derës hyrëse, por nuk kanë arritur të marrin sende nga brenda.

Operacioni u realizua nga Komisariati i Policisë Pogradec në bashkëpunim me Policinë e Kurbinit, ndërsa hetimet vijojnë për identifikimin e personave të tjerë të përfshirë. Materialet i janë referuar Prokurorisë së Korçës për veprime të mëtejshme.