Ish-presidenti i Venezuelës, Nicolás Maduro, dhe bashkëshortja e tij, Cilia Flores, kanë reaguar publikisht për herë të parë pas arrestimit dhe transferimit në një burg federal në SHBA.

Çifti, i cili mbahet në një qendër paraburgimi në Brooklyn prej muajit janar, është shprehur se ndodhet në gjendje të mirë dhe i qetë. “Jemi mirë, të palëkundur dhe në lutje të vazhdueshme”, thuhej në mesazhin e publikuar në rrjetin X.

Maduro dhe Flores po përballen me akuza të rënda nga autoritetet amerikane, përfshirë përfshirje në trafik droge dhe bashkëpunim me grupe të shpallura terroriste. Sipas hetimeve, aktiviteti i dyshuar daton prej fundviteve ’90 dhe përfshin trafikimin e kokainës drejt SHBA-së.

Të dy janë deklaruar të pafajshëm dhe aktualisht ndodhen në paraburgim në pritje të procesit gjyqësor, i cili pritet të jetë kompleks dhe me rëndësi të lartë ndërkombëtare.