Një 19-vjeçar shqiptar është dënuar në Britaninë e Madhe pasi tentoi të siguronte armë zjarri nga SHBA dhe rezultoi i përfshirë edhe në aktivitet kriminal me drogë.

Bëhet fjalë për Henri Nikollin, i cili u dënua me 6 vite e 3 muaj burg. Sipas hetimeve, ai kishte porositur një paketë nga SHBA, e maskuar si “kit trajnimi për qen”, por që në fakt përmbante një pistoletë 9 mm dhe pajisje për armë zjarri. Paketa u zbulua dhe u bllokua nga autoritetet amerikane.

I riu u arrestua në prill të vitit 2025 në Hertfordshire, ndërsa gjatë kontrollit në banesën e tij u gjetën armë të modifikuara për përdorim me municione moderne, municione të ndryshme, si dhe mjete për përshtatjen e armëve.

Gjithashtu, në banesë u zbulua edhe një ambient i përshtatur për kultivimin e kanabisit, si dhe sasi droge e gatshme për shpërndarje.

Sipas prokurorisë, 19-vjeçari kishte ngritur një aktivitet të strukturuar kriminal, ku armët përdoreshin për të mbështetur tregtinë e drogës, duke paraqitur rrezik serioz për sigurinë publike.