Ëndrra e Kosovës për të qenë pjesë e Kupës së Botës është shuar në Prishtinë, pasi Dardanët janë mposhtur minimalisht 0-1 nga Turqia në finalen e play-off-it.

Pjesa e parë u mbyll në barazim pa gola, por me një rast të artë për vendasit. Në minutën e 29-të, Fisnik Asllani provoi me një goditje të fuqishme nga distanca, por portieri turk Çakir devijoi topin, i cili u përplas në traversë.

Në pjesën e dytë, Turqia gjeti menjëherë rrugën e rrjetës. Pas një aksioni të ndërtuar mirë, Kenan Yildiz dërgoi topin në zonë, ku fillimisht provoi Orkun Kökçü, ndërsa Kerem Aktürkoğlu e shtyu më pas në rrjetë. Kosova protestoi për pozicion jashtë loje, por arbitri e konsideroi golin të rregullt.

Në vijim, Kosova u hodh në sulm në kërkim të barazimit, por nuk arriti të ndryshojë fatin e ndeshjes deri në fund.

Turqia siguron kështu rikthimin në Botëror pas shumë vitesh, me pjesëmarrjen e fundit që daton në vitin 2002. Nga ana tjetër, pavarësisht eliminimit, Kosova mbyll një rrugëtim për t’u vlerësuar në këto kualifikuese, duke fituar respekt për paraqitjen e saj.