Operatorët e transportit publik në vend kanë ngritur alarmin për rritjen e kostove, duke kërkuar një paketë emergjente mbështetjeje për të shmangur reduktimin e shërbimit deri në 30% në nivel kombëtar.

Kërkesa kryesore lidhet me kompensimin e çmimit të naftës në masën 100 lekë për litër, për një periudhë 6 mujore. Propozimi është dorëzuar më 1 Prill pranë institucioneve përgjegjëse, si pjesë e një “Pakete antikrizë emergjente”.

Kryetari i Shoqatës Kombëtare të Transportit Qytetas, Kostandin Foni, u shpreh se kjo skemë është plotësisht e zbatueshme, pasi bazohet në një model të ngjashëm me atë të vitit 2022, i cili ka rezultuar efektiv në përballimin e kostove për operatorët.

Sipas tij, kompensimi do të mbështetet mbi faturat reale të furnizimit me karburant, deklarimet tatimore dhe nivelin e konsumit, i cili mbetet i pandryshuar krahasuar me vitin 2022.

Fondi i nevojshëm për zbatimin e kësaj mase përllogaritet në rreth 300 milionë lekë, ose afro 3 milionë euro, një shumë e ngjashme me atë të përdorur gjatë krizës së mëparshme.

Përveç kompensimit të naftës, shoqatat e transportit kanë propozuar edhe masa të tjera fiskale për të ulur kostot, përfshirë heqjen e taksës së qarkullimit dhe akcizës për karburantin, si dhe uljen e TVSH-së nga 20% në 5%.

Dy shoqatat kryesore të sektorit kanë zhvilluar takime dhe kanë dorëzuar zyrtarisht pranë ministrive përkatëse një paketë me katër masa, duke kërkuar ndërhyrje të menjëhershme për të garantuar vijimësinë e shërbimit për qytetarët.