Teherani zyrtar ka rritur ndjeshëm tonet e kërcënimeve ushtarake, duke lëshuar urdhra të prerë për shtabet operacionale që të monitorojnë çdo lëvizje të forcave të Shteteve të Bashkuara dhe Izraelit. Komandanti i përgjithshëm i ushtrisë iraniane, gjatë një takimi urgjent me krerët e lartë ushtarakë, ka kërkuar një mbikëqyrje “moment pas momenti” të lëvizjeve të kundërshtarëve, me qëllim që t’i kundërpërgjigjen me forcë çdo skenari të mundshëm për një pushtim tokësor.

Në një video të publikuar nga agjencia shtetërore e lajmeve, IRNA, shefi i Forcave të Armatosura, Amir Hatami, instruktuar drejtuesit e ushtrisë për një mbrojtje agresive dhe asgjësuese. Sipas përmbledhjes zyrtare të takimit, Hatami ka qenë i prerë: në rast se forcat armike tentojnë të shkelin tokën iraniane përmes operacioneve tokësore, objektivi i ushtrisë duhet të jetë i qartë – asnjë person nga forcat sulmuese nuk duhet të mbijetojë.

Ky urdhër vjen në një kohë tensionesh të larta rajonale, ku Irani po kërkon të shfaqë forcën dhe gatishmërinë e tij mbrojtëse. Hatami ka kërkuar nga vartësit që planet për kundërshtimin e metodave të sulmit të armikut të zbatohen me saktësinë më të lartë. Strategjia e Iranit bazohet në monitorimin e rreptë dhe reagimin e menjëhershëm ndaj çdo taktike që SHBA apo Izraeli mund të përdorin në terren.

Deklaratat e fundit shihen si mesazh i drejtpërdrejtë për Uashingtonin dhe Tel Avivin, duke paralajmëruar pasoja të rënda në rast përshkallëzimi të konfliktit në territorin iranian. Ushtria e Iranit duket se ka kaluar në një fazë të re gatishmërie, ku monitorimi teknologjik dhe operativ është prioritet kryesor për të parandaluar dhe asgjësuar çdo ndërhyrje ushtarake.