Policia e Tiranës ka finalizuar dy operacione të njëpasnjëshme brenda 24 orëve, duke goditur dy raste të vjedhjeve me pasoja të rënda dhe duke vënë në pranga dy persona.

Operacionet, të koduara “The Driver” dhe “Kaseta”, u zhvilluan nga shërbimet e Komisariatit të Policisë Nr. 2, pas kallëzimeve të qytetarëve dhe administratorëve të subjekteve të dëmtuara.

Në kuadër të operacionit “The Driver”, u arrestua shtetasi L. B., 28 vjeç, i cili dyshohet se gjatë një periudhe 6-mujore ka përvetësuar rreth 3 000 000 lekë, duke shitur për llogari të tij pajisje të subjektit ku ishte i punësuar si shofer. Si provë materiale u sekuestrua edhe një automjet në pronësi të subjektit, me të cilin transportoheshin pajisjet.

Ndërkohë, në kuadër të operacionit “Kaseta”, u arrestua shtetasja M. Xh., e dyshuar për vjedhjen e 40 000 paundëve, të lëna përkohësisht në kasetën e depozitimit në një market nga një qytetar, punonjës në një subjekt për këmbimin e valutave. Shuma e parave u gjet në ambientet e subjektit ku ajo punonte dhe u sekuestrua në cilësinë e provës materiale.

Materialet procedurale iu referuan Prokurorisë së Tiranës për veprime të mëtejshme.