Policia Kufitare në Portin e Durrësit ka goditur dy tentativa për kontrabandë mallrash në hyrje të Republikës së Shqipërisë, në kuadër të kontrolleve të shtuara për parandalimin e paligjshmërive dhe garantimin e lëvizjes së sigurt të mallrave.

Sipas njoftimit zyrtar, është arrestuar në flagrancë shtetasi me iniciale A. P., 50 vjeç, banues në Shijak, pasi në kamionin që drejtonte u zbuluan 3300 palë veshje të dyshuara të kontrabanduara, pa dokumentacion shoqërues.

Ndërkohë, nisi procedimi penal për shtetasin Sh. D., 54 vjeç, banues në Rrogozhinë, pasi në kamionçinën që drejtonte u gjetën qindra litra pije alkoolike, si dhe 86 shishe me këtë produkt, të dyshuara të kontrabanduara dhe pa fatura origjine.

Të gjitha mallrat janë sekuestruar, ndërsa materialet procedurale i janë referuar Prokurorisë së Durrësit për veprime të mëtejshme.