Detaje të reja kanë dalë në dritë lidhur me vdekjen e ish-financuesit amerikan Jeffrey Epstein, duke ngritur pikëpyetje të reja mbi momentet e fundit të jetës së tij në burg.

Sipas The New York Times, një shënim i dyshuar vetëvrasjeje i atribuar Epsteinit ka qëndruar i fshehur për gati shtatë vite, i depozituar në një gjykatë në Nju Jork. Dokumenti thuhet se është zbuluar fillimisht në korrik të vitit 2019 nga një ish-shok qelie, i cili pretendon se e gjeti atë pasi Epstein ishte gjetur pa ndjenja me një copë pëlhure rreth qafës. Edhe pse i mbijetoi atij incidenti, disa javë më vonë ai u gjet i vdekur në qelinë e tij.

Sipas dëshmisë së këtij personi, në shënim shkruhej: “Është koha të themi lamtumirë”.

Raportimet tregojnë se dokumenti ishte vulosur nga një gjykatës federal si pjesë e procedurave penale ndaj vetë shokut të qelisë. Kjo situatë bëri që hetuesit që po shqyrtonin vdekjen e Epsteinit të mos kishin akses në materialin që mund të kishte shërbyer si provë e rëndësishme për hetimin.

The New York Times ka paraqitur tashmë një kërkesë zyrtare për deklasifikimin e dokumentit. Ndërkohë, që prej dhjetorit 2025, Departamenti Amerikan i Drejtësisë ka publikuar miliona faqe dokumentesh që lidhen me çështjen Epstein, por sipas gazetës, ky shënim nuk figuron në asnjë prej materialeve të bëra publike.

Një zëdhënëse e Departamentit të Drejtësisë ka deklaruar se institucioni nuk ka qenë asnjëherë në dijeni të ekzistencës së këtij dokumenti. Zbulimi i mundshëm i tij pritet të rihapë debatet mbi vdekjen e Epsteinit, një çështje që vazhdon të ngjallë dyshime të forta në opinionin publik.