Bashkimi Evropian ka vendosur të ndalojë përkohësisht disbursimin e fondeve të mbështetjes financiare për Serbia në kuadër të Planit Evropian të Zhvillimit. Sipas Komisioneres për Zgjerim, Marta Kos, ky hap lidhet me shqetësimet për funksionimin e sistemit gjyqësor në vend.

Ajo theksoi se fondet do të mbeten të bllokuara deri në momentin kur, sipas saj, autoritetet në Beograd të adresojnë problemet e identifikuara që lidhen me efikasitetin dhe pavarësinë e gjyqësorit.

“Në këtë pikë, ne kemi pezulluar të gjitha pagesat për Serbinë sipas planit të zhvillimit, sepse po shohim përsëri një pengesë në sistemin gjyqësor. Derisa kjo të korrigjohet, vendi nuk do të jetë në gjendje të marrë mbështetje financiare nga BE-ja”, tha Kos.

Ky vendim merret në një periudhë kur brenda institucioneve evropiane po zhvillohen diskutime më intensive për vijimin e ndihmës financiare dhe ecurinë e përgjithshme të Serbisë drejt integrimit evropian.

Ndërkohë, raportime të mëhershme mediatike kanë sugjeruar se Brukseli po shqyrton edhe mundësinë e ngrirjes së rreth 1.5 miliardë eurove ndihmë për Serbinë, ku ndër arsyet e përmendura përfshihen edhe marrëdhëniet e Beogradit me Rusinë.