Janë publikuar renditjet më të fundit ndërkombëtare për vitin 2026 nga Skytrax dhe AirlineRatings.com, ku edhe këtë vit vihet re dominimi i qartë i Azisë në industrinë globale të aviacionit.

Singapore Changi Airport është shpallur aeroporti më i mirë në botë për vitin 2026, duke e fituar këtë titull për herë të 14-të në total. Aeroporti i njohur për standardet e larta dhe shërbimet inovative vijon të mbetet referencë globale për eksperiencën e udhëtarëve.

Pesë vendet e para në renditjen botërore të aeroporteve i përkasin të gjitha Azisë: Incheon International renditet i dyti, Tokyo Haneda i treti, Hong Kong International i katërti dhe Narita në vendin e pestë.

Ndërkohë, në renditjen e linjave ajrore, Qatar Airways është shpallur linja ajrore më e mirë në botë me shërbim të plotë, duke zëvendësuar fituesen e vitit të kaluar, Korean Air. Pas saj renditen Cathay Pacific, Singapore Airlines, Korean Air dhe STARLUX Airlines.

Në Europë, aeroporti më i mirë mbetet Paris Charles de Gaulle, i cili renditet i gjashti në botë për të katërtin vit radhazi. Në listën e më të mirëve në kontinent përfshihen edhe Roma Fiumicino, Aeroporti i Stambollit dhe Aeroporti i Mynihut, ndërsa në top 20 hyjnë gjithashtu Helsinki, Vjena, Londra Heathrow, Amsterdami Schiphol dhe Zyrihu.

Sa i përket linjave ajrore europiane, Turkish Airlines kryeson si operatori më i mirë me shërbim të plotë, i ndjekur nga Virgin Atlantic, KLM, Air France dhe LOT Polish Airlines.

Në kategorinë e linjave low-cost, airBaltic renditet si më e mira në Europë, ndërsa pas saj vijnë easyJet, Wizz Air dhe Ryanair. Ndërkohë, Lufthansa është vlerësuar si linja ajrore hibride më e mirë për vitin 2026, falë kombinimit të modelit ekonomik me shërbime të përmirësuara për pasagjerët.

Ekspertët theksojnë se investimet në teknologji, shërbim dhe komoditet po e mbajnë Azinë në krye të industrisë, duke vendosur standarde gjithnjë e më të larta për tregun global të aviacionit.