Shqiptarët festojnë sot Ditën e Verës, një nga festat më të hershme që lidhet me ndërrimin e stinëve dhe ardhjen e pranverës.

14 marsi konsiderohet si një moment simbolik që shënon fundin e dimrit dhe nisjen e një periudhe më të ngrohtë. Kjo traditë është ruajtur ndër vite dhe vijon të festohet në shumë qytete të vendit.

Ndër simbolikat më të njohura është verorja, byzylyku me fije të kuqe dhe të bardha, që sipas besimit popullor sjell fat dhe mbron nga e keqja.

Në këtë ditë nuk mungojnë as ballokumet, sidomos në Elbasan, ku përgatitja e tyre mbetet një traditë e trashëguar brez pas brezi.

Në disa zona vazhdon edhe zakoni i ndezjes së zjarreve, që lidhet me largimin e dimrit dhe fillimin e një cikli të ri.

Kjo festë mbetet një nga traditat më të dashura, që çdo vit rikthen atmosferën e pranverës dhe shënon një nisje të re.