Ministri i Bujqësisë dhe i Zhvillimit Rural, Andis Salla, në një konferencë për shtyp prezantoi Skemën Kombëtare të mbështetjes në bujqësi për vitin 2026.

Sipas tij, Skema Kombëtare 2026 nuk do të përfshijë më mbështetjen e fermerëve me naftë falas, një nga masat më të diskutuara të viteve të fundit.

I pyetur nga gazetarët për këtë ndryshim, Andis Salla shpjegoi se skema e naftës do të zëvendësohet me forma të tjera mbështetjeje, duke përfshirë kompensimin prej 10% të TVSH-së, me qëllim uljen e kostos së prodhimit për fermerët.

Ai theksoi se skema e re është më gjithëpërfshirëse dhe mbulon më gjerë sektorin bujqësor, duke përfshirë masa si autofaturimi i TVSH-së dhe mbështetje të tjera financiare.

“Skema e re kombëtare është një skemë gjithëpërfshirëse ku mbulohen të gjithë fermerët në uljen e kostos së prodhimit. Nëse vitin e kaluar buxheti ishte 4.6 miliardë lekë, këtë vit është rritur në 5.2 miliardë lekë”, u shpreh ministri.

Ndër të rejat kryesore të kësaj skeme është edhe mbështetja për sektorin e derrave, ku për herë të parë do të jepen 7 mijë lekë për çdo dosë në fermat me jo më pak se 5 krerë.

Gjithashtu, fermerët do të përfitojnë 10 mijë lekë për hektar për fermat mbi 3 hektarë tokë.

Kujtojmë se skema e naftës falas nisi për herë të parë në vitin 2021, ku aplikuan mbi 46 mijë fermerë, ndërsa një vit më pas ky numër u rrit në mbi 54 mijë aplikime, me përqendrimin më të madh në qarqet Fier, Korçë, Berat dhe Elbasan.