Opinioni publik është tronditur nga ndarja e papritur nga jeta e mësuesit Alban Bejleri, i njohur për përkushtimin e tij të veçantë, pasi çdo ditë përshkonte kilometra të tëra në këmbë për t’u dhënë mësim vetëm dy nxënësve në fshatin Marjan të Maliqit, ndonëse jetonte në Devoll.

Pas lajmit të kobshëm, familjarë dhe miq të tij kanë dhënë prononcime për mediat, duke e kujtuar atë si një njeri punëtor, të qetë dhe të përkushtuar ndaj arsimit dhe fëmijëve.

Xhaxhai i tij, Besim Bejleri, i përlotur nga humbja, tha se mësuesi Alban bënte rreth 7–8 kilometra rrugë për të shkuar në punë dhe se ishte një njeri i veçantë brenda familjes, e cila numëron shumë mësues.

Sipas tij, ai kishte kaluar periudha pa punë dhe më pas ishte rikthyer në detyrë në një zonë të thellë të Maliqit, ndonëse kishte kërkuar të punonte në Devoll. Ai shtoi se mësuesi nuk ankohej kurrë dhe vazhdonte punën me përkushtim të plotë, pavarësisht vështirësive.

Familjarët theksojnë se ai ishte një mësues me dy universitete dhe se për vite me radhë ka shërbyer me përkushtim, duke udhëtuar çdo ditë për të dhënë mësim vetëm për dy nxënës.