Policia e Korçës ka vijuar operacionin e koduar “The Last Fire”, duke bërë të mundur kapjen dhe arrestimin e një 38-vjeçari të shpallur më herët në kërkim.

Sipas njoftimit zyrtar, i arrestuari dyshohet të jetë porositësi i zjarrvënies së një automjeti në qytetin e Pogradecit, një ngjarje e ndodhur rreth dy muaj më parë, konkretisht më 26 shkurt 2026.

Në kuadër të hetimeve dhe mbi bazën e informacioneve të siguruara në rrugë operative, strukturat e DVP Korçë lokalizuan dhe ndaluan shtetasin me iniciale E. F., 38 vjeç, banues në Korçë.

Arrestimi i tij u krye me urdhër të Prokurorisë së Korçës, për veprën penale “Shkatërrimi i pronës me zjarr”, kryer në bashkëpunim.

Gjatë kontrollit në ambientin ku u kap i dyshuari, policia gjeti dhe sekuestroi një sasi lënde të dyshuar narkotike Cannabis Sativa, e cila do të shërbejë si provë materiale në vijim të hetimeve.

Materialet procedurale i janë referuar Prokurorisë së Korçës, e cila po vijon veprimet e mëtejshme për zbardhjen e plotë të kësaj ngjarjeje.