Kryeministri Edi Rama dhe bashkëshortja e tij, Linda Rama, kanë organizuar mbrëmjen e së enjtes, 12 mars, sofrën e iftarit për besimtarët me rastin e muajit të shenjtë të Ramazanit.

Gjatë fjalës së tij, Rama shprehu dëshirën që ky të jetë mandati i fundit i një kryeministri shqiptar jashtë Bashkimit Evropian, duke vënë në dukje një ngjarje të veçantë: për herë të parë pas tre dekadash, Ramazani dhe Krishtlindja do të bien në të njëjtin vit, 2030.

“Ky është iftari i parë i këtij mandati të katërt, dhe dua të shpreh mirënjohjen time të thellë për myslimanët shqiptarë, për rolin e tyre në shoqëri, duke u uruar gjithashtu të gjitha të mirat për të cilat luten. Në Shqipëri, besimi nuk ndan, por bashkon, dhe kjo sofër simbolizon unitetin, ku islami po ashtu si krishtërimi thërret Evropën drejt bashkëjetesës”, u shpreh kryeministri.

Ai theksoi se kjo sofrë iftari bashkon jo vetëm besimtarët myslimanë, por edhe qytetarë të besimeve të ndryshme dhe jo besimtarë, ndërsa shtoi se argjërimi mëson durimin dhe ndihmon të kontrollosh instinktet brenda vetes.

Ky event në Pallatin e Kongreseve u konsiderua një mesazh i rëndësishëm për harmoninë ndërfetar dhe bashkëjetesën në shoqëri, duke theksuar një moment simbolik për dialogun dhe tolerancën fetare në vend.