Ambasada e Gjermanisë në Tiranë ka reaguar pas vendimit të Kuvendit për të rrëzuar kërkesën e Prokurorisë së Posaçme (SPAK) për dhënien e autorizimit për arrestimin e ish-zv.kryeministres Belinda Balluku.

Në një reagim zyrtar, ambasada thekson se lufta kundër korrupsionit, përfshirë edhe rastet që lidhen me zyrtarë të niveleve të larta, mbetet një kusht thelbësor për përparimin e Shqipërisë në procesin e integrimit europian.

Në deklaratën e saj thuhet:

“Gjermania mbështet procesin e integrimit të Shqipërisë në Bashkimin Evropian në përputhje me dëshirën e shqiptarëve.

Kusht i domosdoshëm për të bërë progres në këtë proces të bazuar në merita është ndjekja penale me efektivitet e korrupsionit edhe në raste të rangut të lartë. Pritshmëria jonë e qartë është që edhe në këto raste ndjekja penale përmes drejtësisë të mund të realizohet shpejt dhe pa pengesa. Prej politikës shqiptare vazhdon të kërkohet ende që ta garantojë këtë proces.”

Kuvendi rrëzoi kërkesën e SPAK me votat e mazhorancës, duke mos dhënë autorizimin për arrestimin e Ballukut.