Një operacion ka çuar në arrestimin në flagrancë të një 44-vjeçari, i cili dyshohet se posedonte armë dhe municion me qëllim trafikimin.

Bëhet fjalë për shtetasin V. R., banues në Durrës, i cili menaxhonte një studio tatuazhesh në lagjen nr. 4. Gjatë kontrollit të ushtruar nga specialistët për Hetimin e Trafiqeve të Paligjshme, në bashkëpunim me Hetimin e Narkotikëve dhe Forcën e Posaçme Operacionale të DVP Durrës, u sekuestruan:

1 armë zjarri pistoletë

1 armë zjarri kallashnikov

1 granatë dhe 2 krehra

Municion luftarak të kalibrave të ndryshëm

1 armë e ftohtë (dorezë metalike)

1 palë pranga si të Policisë

Mjete për pastrimin e armëve dhe 1 celular

Shtetasi V. R. dyshohet për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Trafikimi i armëve dhe i municionit”, “Prodhimi, mbajtja, blerja apo shitja pa leje e armëve të ftohta” dhe “Mbajtja pa të drejtë e uniformës”.

Autoritetet po vijojnë hetimet për identifikimin e personave të tjerë të përfshirë në këtë veprimtari kriminale. Materialet procedurale iu referuan Prokurorisë së Durrësit për veprime të mëtejshme.