Një ngjarje e rëndë është regjistruar në zonën e Lungomares në Vlorë, ku pronari i një lokali është dhunuar nga tre persona të paidentifikuar.

Sipas të dhënave paraprake, ai është goditur fizikisht dhe si pasojë ka pësuar dëmtime, duke u transportuar në spital për ndihmë mjekësore.

Ngjarja ka ndodhur në një nga zonat më të frekuentuara nga qytetarët dhe turistët, duke shkaktuar panik mes të pranishmëve. Kanë qenë familjarët dhe kalimtarët që kanë njoftuar menjëherë policinë.

Forcat e rendit mbërritën në vendngjarje dhe nisën hetimet, ndërsa autorët janë larguar me shpejtësi. Policia po punon për identifikimin dhe kapjen e tyre, si dhe për zbardhjen e plotë të rrethanave.