Komanda Qendrore e Shteteve të Bashkuara (CENTCOM) ka publikuar pamje nga momenti i lëshimit të raketave të reja Precision Strike Missile (PrSM) gjatë operacioneve ushtarake në Lindjen e Mesme.

Në videon e shpërndarë në rrjetin social X, shihen sistemet raketore HIMARS duke lëshuar raketat në drejtim të objektivave iraniane, si pjesë e operacionit të quajtur “Epic Fury”.

Sipas ushtrisë amerikane, kjo është hera e parë që raketat PrSM përdoren në luftim, duke shënuar debutimin e tyre në një konflikt real.

Raketa Precision Strike Missile (PrSM) është një armë e gjeneratës së re e zhvilluar nga kompania Lockheed Martin për të zëvendësuar sistemin e mëparshëm ATACMS. Ajo mund të godasë objektiva në distanca mbi 500 kilometra dhe përdor sisteme navigimi me GPS dhe navigim inertial për goditje me saktësi të lartë.

Sipas ekspertëve ushtarakë, përdorimi i kësaj rakete i jep ushtrisë amerikane një aftësi shumë më të madhe për të goditur objektiva strategjikë, si baza ushtarake, sisteme të mbrojtjes ajrore, qendra komande apo pozicione raketore shumë larg vijës së frontit.

Operacioni “Epic Fury”, i nisur në fund të shkurtit, përfshin goditje ndaj infrastrukturës ushtarake iraniane dhe konsiderohet një nga operacionet më të mëdha ushtarake të SHBA në rajon gjatë viteve të fundit.