Protesta e studentëve dhe gjimnazistëve është përshkallëzuar edhe në Durrës, ku të rinjtë nuk janë mjaftuar vetëm me bojkotimin e mësimit, por kanë dalë në rrugët e qytetit, duke protestuar para institucioneve vendore.

Sipas raportimeve paraprake, protestuesit kanë ndezur zjarr përpara godinës së Bashkisë së Durrësit, duke përdorur edhe flamuj të shkulur nga instalimet e Bienales.

Gjithashtu, raportohet se disa kazanë mbeturinash janë përfshirë nga flakët, ndërsa janë dëmtuar edhe tabela reklamuese në qytet.

Gjatë protestës, të rinjtë kanë vijuar thirrjet për dorëheqjen e kryeministrit Edi Rama, duke iu bashkuar kërkesave të protestuesve në Tiranë.

Ndërkohë, në kryeqytet, protesta ka hyrë në ditën e tretë dhe është shoqëruar me tensione pranë Ministrisë së Arsimit. Studentë dhe gjimnazistë kanë nisur marshimin drejt Kryeministrisë dhe Kuvendit, duke shkaktuar ndërprerje të qarkullimit të automjeteve në disa akse rrugore.

Situata në të dy qytetet mbetet e tensionuar, ndërsa ende nuk ka një bilanc zyrtar të dëmeve materiale apo të personave të lënduar.