Danimarka ka njoftuar një skemë të re për punësimin e shtetasve të huaj, ku përfshihet edhe Shqipëria. Duke nisur nga 1 janari 2027, qytetarët shqiptarë do të kenë një mundësi shtesë për të siguruar leje qëndrimi dhe pune në këtë vend, nëse plotësojnë kushtet e përcaktuara.

Lajmi është konfirmuar nga Agjencia Daneze për Rekrutimin dhe Integrimin Ndërkombëtar (SIRI), e cila më 13 tetor publikoi informacionin zyrtar mbi skemën e re, të quajtur “Collective Agreement Scheme”.

Sipas rregullave, punëdhënësit danezë që plotësojnë kriteret do të mund të rekrutojnë punonjës nga 16 vende të përzgjedhura, përfshirë Shqipërinë, duke zbatuar një prag page më të ulët se ai i disa skemave ekzistuese të imigracionit për punë.

Paga minimale e kërkuar për një kontratë pune sipas kësaj skeme është 322 mijë korona daneze në vit, ekuivalente me rreth 43 mijë euro bruto në vit, sipas nivelit të përcaktuar për vitin 2026.

Kjo shumë përfaqëson një kriter minimal page për t’u kualifikuar në skemë dhe jo një pagë të garantuar automatikisht për çdo aplikant.

Shqipëria mes 16 vendeve përfituese

Përveç Shqipërisë, në listën e vendeve të përzgjedhura përfshihen Shtetet e Bashkuara, Kanadaja, Brazili, Mbretëria e Bashkuar, Mali i Zi, Serbia, Maqedonia e Veriut, Ukraina, Moldavia, Singapori, Kina, Japonia, Australia, Malajzia dhe India.

Megjithatë, vetëm shtetësia e një prej këtyre vendeve nuk mjafton për të përfituar lejen e punës.

Aplikantët duhet të kenë një ofertë konkrete punësimi nga një kompani daneze e certifikuar, ndërsa pozicioni duhet të mbulohet nga një marrëveshje kolektive pune dhe të përmbushë kërkesat për punësim me kohë të plotë.

Kompanitë që dëshirojnë të punësojnë shtetas të huaj përmes kësaj skeme duhet fillimisht të certifikohen nga SIRI.

Kur nisin aplikimet?

Sipas autoriteteve daneze, kompanitë pritet të kenë mundësi të paraqesin kërkesat për certifikim që në fillim të dhjetorit 2026.

Ndërkohë, shqyrtimi i aplikimeve për leje qëndrimi dhe pune do të nisë më 1 janar 2027, kur skema të hyjë zyrtarisht në fuqi.

Autoritetet kanë bërë të ditur se udhëzimet dhe formularët përkatës do të publikohen në faqen zyrtare të emigracionit danez.

Për shqiptarët që synojnë të punojnë në Danimarkë, skema përfaqëson një mundësi të re ligjore për t’u punësuar në kompani që plotësojnë kriteret e përcaktuara, veçanërisht në sektorët ku zbatohen marrëveshje kolektive pune.