Tre persona të shpallur në kërkim për vepra të ndryshme penale janë arrestuar gjatë 24 orëve të fundit në Vlorë, në kuadër të tre operacioneve të zhvilluara nga strukturat e Policisë.

Mes të arrestuarve është edhe Maringlen Doga, 47 vjeç, banues në Vlorë, i dënuar me 20 vite burg për një vrasje të kryer në Itali.

Sipas Policisë, Doga u lokalizua dhe u arrestua në lagjen “Pavarësia 3”, gjatë një operacioni të zhvilluar nga strukturat e Hetimit të Krimeve të Rënda, Mbështetja Operacionale dhe Forca e Posaçme “Shqiponja”.

47-vjeçari është dënuar nga autoritetet gjyqësore italiane për vrasjen me thikë të një shtetasi shqiptar në vitin 2000, në Ravena, pas një konflikti për motive të dobëta. Vendimi është njohur nga Gjykata e Vlorës, e cila ka caktuar dënimin me 20 vite burg.

Në një tjetër operacion, Policia arrestoi shtetasin Y. D., 49 vjeç, banues në Bishan, i shpallur në kërkim pasi gjatë kontrollit në banesën e tij, më 31 tetor 2026, u gjetën rreth 12 kilogramë lëndë e dyshuar narkotike Cannabis Sativa dhe 6 bimë të dyshuara narkotike.

Ndërkohë, në pranga ra edhe shtetasi A. K., 50 vjeç, banues në Vlorë, i dyshuar për pesë raste vjedhjeje.

Sipas hetimeve, gjatë muajve tetor dhe nëntor 2026, ai dyshohet se ka vjedhur shuma parash, portofol, laptop dhe telefon celular nga qytetarë dhe subjekte të ndryshme në qytetin e Vlorës.

Të tre personat janë ndaluar, ndërsa materialet procedurale i janë referuar Prokurorisë për veprime të mëtejshme.