Gjykata e Posaçme Kundër Korrupsionit dhe Krimit të Organizuar vendosi këtë të mërkurë që dosja ndaj ish-presidentit Ilir Meta, ish-bashkëshortes së tij Monika Kryemadhi, si dhe tre personave të tjerë, të vijojë në gjykim në themel.

Gjyqtarja e seancës paraprake, Irena Gjoka, kishte përfunduar javën e kaluar shqyrtimin e çështjes, pas një procesi që zgjati rreth 8 muaj, që prej momentit kur SPAK depozitoi kërkesën për dërgimin në gjykim të Metës dhe Kryemadhit. Të dy akuzohen për korrupsion, pastrim parash dhe fshehje pasurie.

Në të njëjtën çështje janë të përfshirë edhe Pirro Xhixho, Ema Çoku dhe Fatime Kryemadhi, nëna e ish-kryetares së LSI. Xhixho përballet me akuzë për korrupsion, ndërsa dy të tjerat akuzohen për pastrim parash.