Një punonjës i IEVP Drenovë i është drejtuar redaksisë së Albania Today me një denoncim lidhur me mënyrën e llogaritjes së ditëve të punës, pagave dhe situatën brenda strukturave të burgut.
Sipas denoncuesit, prej shume muajsh punonjësve u janë mbajtur nga 3 deri në 4 ditë pune, të cilat, sipas tij, janë përdorur për nevojat e institucionit. Ai ngre shqetësimin se punonjësit e kanë të vështirë të kundërshtojnë këtë praktikë.
Në denoncim përmendet edhe shefi i policisë, Rigenc Kordalli. Punonjësi pretendon se, përballë kundërshtimeve të stafit, është përdorur shprehja: “Kush të dojë të vijë, kush s’dojë, dera e postobllokut është e hapur”.
Denoncuesi ngre gjithashtu pikëpyetje për largimet nga detyra dhe funksionimin e strukturave drejtuese në IEVP Drenovë.
“Ku janë kontrollet e auditit? Përse punonjësit e policisë së burgut Drenovë kanë dhënë dorëheqjen? Ku janë shefat e regjimit?”, shkruan ai, duke pretenduar se disa drejtues janë larguar dhe se institucioni po përballet me probleme në organizimin e punës.
Albania Today e publikon denoncimin në interes të transparencës. Pretendimet i përkasin denoncuesit dhe nuk janë verifikuar në mënyrë të pavarur nga redaksia.
Redaksia i bën thirrje institucioneve përgjegjëse të reagojnë dhe të sqarojnë publikisht mënyrën e llogaritjes së ditëve të punës, pagave, si dhe situatën e largimeve në IEVP Drenovë.
