Tashmë kanë nisur arrestimet pas zjarrit që shkatërroi dhjetëra apartamente në pallatin në Tiranë.

Ende nuk dihet numri i personave të arrestuar, teksa autoritetet po vijojnë ende hetimet.

Deri më tani mësohet se të arrestuar janë disa persona, teksa dy prej tyre menaxheri i një marketi dhe administratori i pallatit.

Inspektorati i Përgjithshëm ka reaguar në lidhje me zjarrin e madh që shkrumboi pallatin në Tiranë, duke zbuluar se është ngritur grupi i punës për inspektim i menjëhershëm të shkaqeve të këtij aksidenti.

Një zjarr i fuqishëm përfshiu pallatin, pjesë e një kompleksi, në afërsi të QSUT në Tiranë gjatë ditës së djeshme, duke shkaktuar dëme të konsiderueshme materiale.

Mëngjesin e sotëm, pas shuarjes së flakëve, situata ka qenë e rëndë, ku fasada e ndërtesës është djegur pothuajse tërësisht.

8 persona janë asfiksuar nga tymi, mes tyre 6 zjarrfikës dhe 2 qytetarë.

Në ndihmë të forcave zjarrfikëse u angazhuan edhe 2 helikopterë Cougar, ndërsa operacioni për shuarjen e plotë të flakëve ka zgjatur për disa orë.

Autoritetet vijojnë hetimet për të zbardhur shkaqet e zjarrit, ndërsa dëmet materiale raportohen të jenë të konsiderueshme.