Kryetari i Bashkisë së Tiranës, Erion Veliaj, i është drejtuar Prokurorisë së Tiranës me një kallëzim ku kërkon nisjen e hetimeve për falsifikim dokumentesh.

Në kallëzim, Veliaj pretendon se procedimi penal ndaj tij është bazuar në një dokument të nënshkruar nga një person i vetëquajtur “Nesti Angoni”, i cili sipas verifikimeve nuk figuron në regjistrat e gjendjes civile. Ai ngre gjithashtu dyshime edhe për një tjetër identitet të përdorur, “Nasta Pëllumbi”.

Sipas pretendimeve të tij, këto identitete të rreme janë përdorur për të iniciuar një proces hetimor ndaj tij, duke kërkuar që Prokuroria të identifikojë autorët realë të dokumentit dhe të hetojë përgjegjësitë penale përkatëse.

Veliaj kërkon gjithashtu regjistrimin e procedimit penal për veprën e “falsifikimit të dokumenteve” dhe verifikimin e çdo materiali që ka shërbyer si bazë për nisjen e hetimeve ndaj tij.

Në kallëzim theksohet se përdorimi i identiteteve të dyshuara të rreme mund të ketë ndikuar në nisjen e një procesi penal mbi baza të pavërteta, çështje që sipas tij duhet hetuar plotësisht nga organet e drejtësisë.