Mes trishtimit dhe dhimbjes familja e Xhuana Nikollajt i ka bërë apel institucioneve që të vihet në vend drejtësia për ndarjen nga jeta të vajzës së tyre.

Ata i kërkojnë shtetit që të intensifikojnë kërkimet për të arrestuar ish-bashkëshortin e saj, i shpallur në kërkim, i cili dyshohet se e ka shtyrë atë drejt vetëvrasjes.

Babai tregon për shenjat e dhunës që, sipas tij, ishin të dukshme në trupin e Xhuanës. Ai shton se telefoni i saj ende nuk është hapur nga policia, një detaj që, sipas familjes, mund të zbardhë të vërtetën.

“Dhimbjen e kam të madhe, i bëj apel institucioneve që të vënë dorën në zemër dhe të vënë drejtësi për atë krim që ka bërë ai kriminel dhe të kapet sa më parë. Vajza ime s’i ka pasur asnjë borxh. Kushdo që e sheh ta denoncojnë dhe ta çojnë para drejtësisë.

Ekspertët të marrin dhe të hapin telefonin e vajzës time. Ditën kur tërhoqëm nga morgut trupin, ka pasur shenja në nofull, trup, krah, gjithkund, e ka bërë sikur të ishte egërsirë. Kërkoj të dënohet sa më shumë…. Nofullën e ka me shenja, ndoshta dhe i ka dhënë me zor helmin. Nuk e dimë”, tha babai i saj.

Mes lotësh dhe dhimbjes që, sipas tyre, nuk do të shuhet kurrë, familja Nikollajt ka një apel të drejtpërdrejtë…

“Duam që ai djalë të kapet, Eraldo Fizi, të vuaj dënimin dhe të tregojë pse e ka rrahur motrën tonë”, tha motra e së ndjerës.