Policia ka arrestuar autorin e grabitjes së një pike këmbimi valutor, ngjarje e ndodhur mëngjesin e së enjtes në qendrën tregtare “Concord Center”, në zonën e “5 Majit” në Tiranë.

Sipas informacioneve paraprake, në pranga ka rënë 42-vjeçari Luan Maçi, i cili dyshohet se ka hyrë në ambientet e pikës së “Exchange”-it i veshur me rroba të zeza dhe me kapuç në kokë. Nën kërcënimin e armës ai ka marrë një shumë parash dhe më pas është larguar nga vendngjarja.

Pas grabitjes, autori është arratisur me një motor pa targa, ndërsa itinerari i tij është filmuar nga kamerat e shumta të sigurisë në zonë. Pamjet kanë ndihmuar policinë për identifikimin dhe arrestimin e tij vetëm disa orë pas ngjarjes.

Burime paraprake bëjnë me dije se nga grabitja dyshohet të jetë marrë një shumë rreth 1.2 milionë lekë. Ndërkohë pritet që policia të japë detaje të tjera zyrtare për rrethanat e plota të ngjarjes.