Presidenti i Shteteve të Bashkuara, Donald Trump, ka kritikuar sërish vendet anëtare të NATO-s për mungesën e mbështetjes gjatë konfliktit me Iranin, duke deklaruar se ishte “shumë i zhgënjyer” nga qëndrimi i aleatëve.

Gjatë një deklarate për mediat në Ankara, në krah të presidentit turk Rexhep Taip Erdogan, Trump tha se kishte “testuar” aleatët për të parë nëse do të qëndronin pranë SHBA-së në një moment të vështirë.

“Isha duke i testuar njerëzit. Doja të shihja nëse do të ishin aty për ne, sepse prej kohësh kam thënë se ne i ndihmojmë ata, por nuk jam i sigurt nëse ata do të ishin aty për ne,” u shpreh Trump.

Presidenti amerikan kritikoi faktin që disa vende të NATO-s zgjodhën të mos përfshiheshin në konfliktin me Iranin.

“Nuk u trajtuam mirë. Madje, nuk doja as ndihmën e tyre, pasi ata thanë se nuk do të ishin aty. Ne kemi investuar triliona dollarë në NATO për të mbrojtur vendet europiane dhe të tjerët,” deklaroi ai.

Trump përmendi me emër Italinë, Gjermaninë dhe Francën, duke thënë se ato refuzuan të mbështesnin Shtetet e Bashkuara.

“Italia na refuzoi, Gjermania na refuzoi dhe Franca na refuzoi. Është në rregull, por pse ne shpenzojmë qindra miliarda dollarë, ndërsa ata nuk janë aty për ne? Ne kemi qenë gjithmonë pranë tyre,” tha presidenti amerikan.

Ai komentoi edhe vendimin e kryeministrit britanik në largim, Keir Starmer, për të lejuar përdorimin e bazave ajrore britanike nga forcat amerikane vetëm për sulme me karakter mbrojtës ndaj Iranit, duke e cilësuar këtë si një vendim “shumë jopopullor”.

Trump shtoi gjithashtu se, nëse samiti i NATO-s nuk do të zhvillohej në Turqi, mund të mos kishte marrë pjesë fare në të.

“Nëse samiti nuk do të mbahej në Turqi, ku miku im është një lider shumë i fortë, është e mundur që nuk do të kisha ardhur,” tha ai, duke iu referuar presidentit turk RecepRexhep Taip Erdogan.