Gjermania ka bërë një ndryshim të rëndësishëm në ligjin për shërbimin ushtarak, duke prekur miliona meshkuj të moshës 17 deri në 45 vjeç.

Sipas medias gjermane Berliner Zeitung, ata nuk mund të largohen më nga vendi për periudha më të gjata se tre muaj pa marrë më parë një leje nga autoritetet përkatëse.

Rregulli ka hyrë në fuqi që prej 1 janarit 2026 dhe vlen për çdo rast qëndrimi jashtë vendit, qoftë për studime, punë apo udhëtime të gjata.

Ndryshimi është pjesë e ligjit për modernizimin e shërbimit ushtarak dhe, ndryshe nga më parë, nuk zbatohet vetëm në raste lufte apo rreziku të lartë, por edhe në kushte normale.

Sipas autoriteteve gjermane, qëllimi i kësaj mase është që shteti të ketë një pasqyrë të saktë të personave që mund të thirren në rast nevoje, duke ditur nëse ndodhen brenda apo jashtë vendit.

Megjithatë, mbetet ende e paqartë se si do të zbatohet në praktikë ky rregull dhe çfarë pasojash mund të ketë për ata që nuk kërkojnë leje përpara largimit.