Një 18-vjeçar është arrestuar nga Policia e Lezhës, pasi dyshohet se shpërndante lëndë narkotike Cannabis Sativa në doza, kryesisht në afërsi të shkollave.

Arrestimi u krye në kuadër të operacionit policor të koduar “Impuls”, të zhvilluar nga specialistët e Hetimit të Narkotikëve, në bashkëpunim me strukturat e Mbështetjes Operacionale të DVP Lezhë.

Në pranga ka rënë shtetasi K. P., 18 vjeç, banues në Ishull Lezhë, i cili u kap në flagrancë gjatë ndërhyrjes së Policisë.

Sipas njoftimit zyrtar, gjatë kontrollit fizik të të riut u gjetën disa doza të dyshuara kanabisi, të përgatitura për shitje. Më pas, gjatë kontrollit në banesën e tij, policia zbuloi sasi të tjera të së njëjtës lëndë.

Në total, u sekuestruan 83 doza të dyshuara Cannabis Sativa dhe një telefon celular.

Nga veprimet hetimore dyshohet se 18-vjeçari ushtronte aktivitetin e shpërndarjes së drogës në qytetin e Lezhës, veçanërisht pranë institucioneve arsimore.

Operacioni u zhvillua në kuadër të planit operacional “Shkolla të pastra”, që synon parandalimin dhe goditjen e shitjes së lëndëve narkotike në afërsi të shkollave.

Materialet procedurale i janë referuar Prokurorisë së Lezhës për veprime të mëtejshme hetimore.