Deputeti i PD, Belind Këlliçi ka akuzuar qeverinë për mënyrën se si është menaxhuar projekti i Unazës së Burrelit, duke thënë se investimi është paraqitur si arritje, por në praktikë ka dështuar brenda një kohe të shkurtër.

Sipas tij, në fund të tetorit të vitit të kaluar, kryeministri Edi Rama e prezantoi projektin si të përfunduar, duke publikuar edhe pamje nga punimet dhe rehabilitimi i rrugës. Megjithatë, vetëm pak muaj më pas, Këlliçi pretendon se segmenti rrugor që kushtoi rreth 1.2 milionë euro ka pësuar shembje në disa pika dhe gjendja e tij është përkeqësuar më tej.

Ai shton se aktualisht nuk ka ndërhyrje për riparim dhe as përgjegjësi të mbajtur për dëmet e shkaktuara, ndërsa sipas tij, projekti është lënë në degradim të plotë.

Reagimi i plotë

Nga fundi i tetorit të vitit të kaluar, Edi Rama mburrej se po përfundonte Unaza e Burrelit dhe nxori foto nga punimet e nga gjithë shtresat, e nga transformimi i madh.
3 muaj më pas Unaza që kushtoi 1.2 milionë euro u shemb në disa vende. Sot, ajo ka degraduar edhe më shumë. Asnjë ndërhyrje, asnjë masë, asnjë përgjegjësi.
Hera e fundit që kryeministri u lidh me këtë projekt ishte për propagandë. Nuk ndjehet më, edhe pse sot fotot e pamjet tregojnë degradimin.
Njësoj si ky rast, është e gjithë qeverisja e rilindjes. Fondet jepen, merren, ndahen, punët nuk bëhen, qytetarët lihen pastaj në fatin e tyre.