Mbetje njerëzore janë gjetur në bordin e një anijeje mallrash tajlandeze, pas një sulmi të ndodhur muajin e kaluar në Ngushticën e Hormuzit.

Anija ‘MV Mayuree Naree’ u godit nga predha të paidentifikuara, sipas raportimeve të mëparshme të agjencisë iraniane Tasnim.

Kompania tajlandeze Precious Shipping konfirmoi se mbetjet janë gjetur në zonën e dëmtuar të anijes, por ende nuk dihet identiteti apo numri i saktë i viktimave.

Pas sulmit, Marina e Omanit arriti të shpëtojë 20 anëtarë të ekuipazhit, ndërsa tre të tjerë rezultuan të zhdukur.

Shpërthimi ndodhi në pjesën e pasme të anijes, duke shkaktuar zjarr në dhomën e motorëve dhe dëme të konsiderueshme.

Ngjarja vjen në një periudhë tensionesh të larta në këtë korridor strategjik detar, një nga më të rëndësishmit për transportin global të naftës.