DVP Tiranë ka arrestuar një 22-vjeçar, i cili dyshohet se ka kanosur me armë zjarri një 33-vjeçar dhe i ka përplasur qëllimisht automjetin, në një konflikt të ndodhur për motive të dobëta në lagjen “Bathore”.

Menjëherë pas njoftimit për ngjarjen, shërbimet e Komisariatit të Policisë Nr. 5 kanë shkuar në vendngjarje për identifikimin e personave të përfshirë dhe sqarimin e rrethanave.

Si rezultat i veprimeve hetimore, është arrestuar në flagrancë shtetasi A. E., 22 vjeç. Sipas policisë, ai dyshohet se fillimisht ka përplasur me automjet automjetin e shtetasit B. J., 33 vjeç, dhe më pas e ka kanosur me armë zjarri, duke qëlluar në ajër. Më pas, në bashkëpunim me shtetas të tjerë, dyshohet se e ka goditur edhe fizikisht 33-vjeçarin.

Gjatë operacionit është sekuestruar automjeti tip “Range Rover” i 22-vjeçarit, në cilësinë e provës materiale.

Policia bën me dije se vijojnë kërkimet për gjetjen e armës së dyshuar të përdorur në ngjarje, si dhe hetimet për lokalizimin dhe kapjen e shtetasve të tjerë të përfshirë.

Materialet procedurale i janë referuar Prokurorisë së Tiranës për veprime të mëtejshme.