Deputeti i Partisë Socialiste, Pirro Vengu, ka ngritur shqetësimin për një fenomen që sipas tij po prek sektorin e turizmit, duke e cilësuar si një sulm të koordinuar ndaj bizneseve dhe turistëve.

I ftuar në emisionin “Now” me Erla Mëhillin në Euronews, Vengu tha se disa turistëve që kanë kryer rezervime në hotele në Vlorë u janë dërguar mesazhe private në WhatsApp nga kontakte të panjohura, ku u kërkohet të anulojnë prenotimet.

Sipas tij, deri tani janë evidentuar 8 sinjalizime dhe rreth 50 biznese të prekura, ndërsa dyshimet paraprake lidhen me një sulm kibernetik të koordinuar.

“Rezultojnë 8 sinjalizime dhe rreth 50 biznese të prekura. Dyshimet janë për një sulm kibernetik të koordinuar. Materialet janë sinjalizime nga sipërmarrës, në rastin tonë në Vlorë”, tha Vengu.

Ai shpjegoi se turistët marrin mesazhe ku pretendohet se rezervimi i tyre nuk është konfirmuar plotësisht dhe jepen arsye të ndryshme për ta bërë atë të duket i pavlefshëm, me qëllim që ata të anulojnë qëndrimin e rezervuar.

“Mesazhet u dërgohen në WhatsApp nga një kontakt i panjohur, i cili u thotë se rezervimi nuk është konfirmuar plotësisht dhe i nxit praktikisht njerëzit të anulojnë prenotimin”, u shpreh deputeti socialist.

Vengu theksoi se identifikimi i burimit të sulmeve kibernetike është një proces kompleks, por sipas tij Policia e Shtetit po mbledh të dhënat e nevojshme për të zbardhur rastin.

“Policia e Shtetit ka kompetencën teknike dhe juridiksionin për ta bërë këtë hetim. Ka dyshime të arsyeshme se bëhet fjalë për një sulm të koordinuar, me dëshirë për të pasur impakt në biznes dhe të përqendruar në kohë”, deklaroi ai.

Sipas Vengut, qëllimi i këtij fenomeni dyshohet se është dëmtimi i besimit të turistëve dhe krijimi i një efekti negativ tek sipërmarrësit e sektorit të turizmit në vend.