Përplasje të forta mes punonjësve të Policisë së Shtetit dhe protestuesve që kanë dalë pasditen e sotme përpara Kryeministrisë, sepse qytetarët nuk kanë lejuar efektivët që të shoqërojnë aktivistët Edison Lika dhe Dritan Goxhaj.

Protestuesit kanë rrethuar furgonin e patrullës dhe për disa minuta janë përplasur me efektivët, duke kërkuar që dy aktivistët të nxirreshin nga furgoni dhe të liheshin të lirë.

Sipas informacioneve paraprake, shoqërimi i tyre ka ardhur pas një përplasjeje me efektivët e policisë, pasi dy protestuesit kanë refuzuar të marrin fletën e gjobës së vendosur ndaj tyre.

Policët që shkuan me furgon në mes të turmës kanë qenë të papërgatitur dhe janë gjendur në mes të turmës që i rrethoi dhe disa herë tentonte të hapte me forcë furgonin, ndaj pas disa minutash aty mbërritën përforcime.

Dhjetëra efektivë të Shqiponjave hodhën spraj dhe i larguan me forcë protestuesit, për të liruar rrugën për furgonin me dy protestues.