Gjykata e Lartë ka rrëzuar rekursin e ish-zv.kryeministres, Belinda Balluku lidhur me masën “ndalim i daljes jashtë vendit”.

Gjyqtari Ilir Panda vendosi të mos pranojë kërkesën e ish-numrit dy të qeverisë, të cilës me vendim të GJKKO i është bllokuar pashaporta që prej nëntorit të vitit të kaluar, kur iu komunikua edhe akuza e shkeljes së barazisë në tendera.

Gjykata e Lartë rrëzoi edhe ankimin e ish-kreut të KESH, Erald Elezi, i cili mbetet në masën arrest shtëpie, i akuzuar për shkelje të barazisë në tenderë në Tunelin e Llogarasë dhe Unazën e Madhe.

Belinda Balluku është marrë zyrtarisht e pandehur, në 31 tetor 2025 dhe akuzohet nga Prokuroria e Posaçme për “shkeljen e barazisë në tendera e ankande publikë” e kryer në bashkëpunim, në procedurën për ndërtimin e Tunelit të Llogarasë dhe të Unazës së Madhe. Këto dy afera i kanë kushtuar buxhetit të shtetit qindra miliona euro.

Ndërkohë, SPAK ka nisur edhe një hetim pasuror ndaj ish-zv.kryeministres. SPAK ka adresuar disa shkresa në bankat e nivelit të dytë në Shqipëri për të kërkuar informacione mbi pasurinë e Ballukut, ndërkohë që kanë kërkuar të dhëna edhe në ILDKPI dhe disa institucione të tjera. Gjithashtu një hetim ka nisur edhe për kompanitë që kanë bashkëpunuar me ish-ministren.