Jo më ndalim automjetesh për verifikim rutinë. Ky është urdhri i prerë që ka firmosur drejtori i përgithshëm i policisë së shtetit Skënder Hitaj.

Në një telegram dërguar të gjithë drejtuesve të Drejtorive Vendore të policisë, Skënder Hitaj ka urdhëruar heqjen e shërbimeve të dukshme të policisë rrugore.

Ky vendim vjen pas shqetësimeve në rritje të drejtuesve të automjeteve për ndalimiet rutinë që u bëhen nga policia rrugore, pa patur një bazë të qartë ligjore, praktikë kjo që është aplikuar prej vitesh në vendin tonë.

Urdhi i drejtorit të përgjithshëm të policisë së shtetit ka hyrë në fuqi disa ditë më parë, teksa është kërkuar që shkeljet që do të konstatohen nga drejtuesit e automjeteve apo motomjeteve, të bëhen vetëm përmes pajisjeve teknologjike si radarët për shpejtësinë, dronët etj.

Në të njëjtin telegram, Hitaj nënvizon se në rastet kur kërkohet konstatimi i shkeljeve në prezencë të drejtuesve të mjeteve, duhet të hartohet një plan masash i qartë për pikat e kontrollit dhe në krye të tyre të jenë shefat e sektorëve apo seksioneve të policisë rrugore.