Pasi korrupsioni dhe të korruptuarit u mbrojtën me votë, siç ishte rasti i Belinda Ballukut, tani mazhoranca po pengon edhe Kuvendin që t’i kërkojë llogari qeverisë.

Kreu i Kuvendit, Niko Peleshi, ka marrë vendimin që të mos pranojë asnjë nga interpelancat e kërkuar nga opozita, për çështjet që janë nën hetimin e Prokurorisë së Posaçme.

Sipas tij, këto interpelanca do të ndërhynin në punën e Prokurorisë, ndaj edhe ka marrë vendimin që të mos pranojë asnjë prej tyre. Sot, ai komunikoi se nuk ka pranuar 2 interpelanca me ministrin e Bujqësisë, Andis Salla, të kërkuar nga opozita për findet e IPARD II, të të cilat sipas hetimeve i përfituan persona të lidhur me qeverinë dhe mazhorancën.

Por, Peleshit i është kundërpërgjigjur deputeti i Partisë Mundësia, Erald Kapri, të cilit nuk iu pranua interpelanca me ministrin Salla. Në fjalën e tij, Kapri tha se në Shqipëri të gjitha çështjet e mëdha janë në hetim nga SPAK, ndaj kjo do të thotë që të mbyllet Parlamenti, se s’ka çfarë llogarie i kërkon qeverisë.

“Argumenti juaj që ne nuk duhet të kërkojmë llogari në Kuvend se çështjet janë nën hetim, i bie që të mbyllim Parlamentin, sepse nuk ka çështje madhore në këtë vend që nuk është nën hetim. Por ne s’kemi punë me Prokurorinë. I kërkojmë llogari ministrit të Bujqësisë që tha se në qershor hapet IPARD III, 190 milionë euro. Komisioni Europian thotë të kundërtën. Nuk ka logjikë kjo të mohojmë interpelancat.

Për fondet e IPARD është anuluar, edhe interpelancë me kryeministrin Rama për mbrojtjen e të dhënave në lidhje me AKSHI-n dhe Air Albania. PEdhe për Thumanë Kashar kemi dy vite  e gjysmë dhe nuk bëhet. Ministri dhe qeveria duhet të japë llogari këtu. Dhe nuk mundet dot të ndalojnë parlamenti se është çështja në hetim. Ne duam të bëjmë interpelancat tona siç e vlerëson Kushtetuta”, tha Kapri.