Qendra tregtare “Toptani”, që ndodhet në zemër të kryeqytetit, u evakuua mbrëmjen e sotme pas një alarmi fals për sulm me bombë.
Ka qenë shefi i sigurisë së qendrës tregtare i cili është vënë në alarm për një sulm me bombë, nëpërmjet emailit.
Në email thuhej se brenda godinës “është vendosur një sasi lëndë plasëse, e cila do shpërthejë në orën 20:30”.
Ndërsa objekti u boshatis plotësisht nga klientët, konsumatorët dhe stafi, brenda saj forcat blu ushtruan kontrolle me qen në mënyrë të imtësishme për të zbuluar të vërtetën e informacionit, i cili rezultoi i rremë.
Njoftimi i policisë:
Rreth orës 20:10, shtetasi A. D, ka njoftuar sallën operative të DVP Tiranë se në email e tij ka ardhur një mesazh se në qendrën tregtare ku ai punon si shef security është vendosur një sasi lëndë plasëse, e cila do shpërthejë në orën 20:30.
Menjeherë në vendngjarje kanë shkuar shërbimet e Policisë, Forcat Xheniere dhe shërbimet e Antiterritorit, të cilët kanë kontrolluar qendrën dhe nuk kanë konstatuar asgjë të paligjshme.
Grupi hetimor po punon për identifikimin e shtetasit që ka dërguar emailin dhe për sqarimin e rrethanave të rastit.
