Veterani 39-vjeçar i Forcave Ajrore Amerikane, Matthew James Sullivan, është gjetur i vdekur, vetëm disa muaj para se të dëshmonte para Kongresit në lidhje me programet sekrete qeveritare që lidhen me UFO-t.

Sipas autoriteteve të ekzaminuesit mjekësorë të Virxhinias, vdekja e tij, më 12 maj 2024, iu atribuua një “mbidoze aksidentale” nga një kombinim i alkoolit dhe ilaçeve, duke përfshirë Alprazolam, relaksues muskujsh dhe antidepresivë.

Megjithatë, rrethanat e vdekjes së tij kanë ngritur alarm politik. Përfaqësuesi Eric Burlison e quajti rastin “jashtëzakonisht shqetësues” dhe bëri thirrje që FBI të ndërhyjë, duke përmendur implikime të mundshme të sigurisë kombëtare.

Në një letër drejtuar drejtorit të FBI-së, Kash Patel, vihet re se “rrethanat e papritura dhe të dyshimta të vdekjes ngrenë pyetje serioze, veçanërisht ndërsa Sullivan po përgatitej të dëshmonte para Kongresit”.

FBI, pa komentuar konkretisht për rastin, konfirmoi se po heton lidhjet e mundshme midis vdekjes së Sullivan dhe rasteve të tjera të shkencëtarëve të zhdukur ose të vdekur në SHBA.

Sullivan, një fitues i Yllit të Bronztë për veprimet e tij në Operacionin Liria e Qëndrueshme, kishte shërbyer në agjenci kritike të inteligjencës, siç janë Forcat Ajrore dhe Agjencia e Sigurisë Kombëtare.

Sipas burimeve, ai mori pjesë në një program sekret të mbledhjes së mbeturinave të UFO-ve dhe dyshohet se kishte parë nga afër objekte fluturuese të paidentifikuara në posedim të qeverisë amerikane. Dëshmia e tij e ardhshme besohet se do të zbulonte informacione thelbësore rreth dekadave të operacioneve sekrete.

Ndërkohë, dëshmitarë të tjerë kanë raportuar gjithashtu kërcënime. Ish-oficeri David Grusch i tha Kongresit se SHBA-të kanë UFO dhe “artefakte biologjike jo-njerëzore”, ndërsa zbuloi gjithashtu se ai mori kërcënime për jetën.

Rasti Sullivan, i kombinuar me të tjerët, përforcon skenarët e një rrjeti të errët që rrethon programet sekrete dhe ngre pyetje të reja në lidhje me sigurinë e atyre që përpiqen të flasin publikisht.