Nuk mungojnë debatet në seancën e sotme, teksa skenën e morën edhe deputeti i PS, Ardit Bido dhe ai i Lëvizjes Bashkë, Redi Muçi. Ishte Bido, që fillimisht e akuzoi Muçin për zaptimin e oborrit të shkollës “Koto Hoxhi” në Gjirokastër.

“Në rend është edhe projekt-rezoluta për krimet dhe pasojat e komunizmit. Të dëgjosh sot të citohen emra marksist është ofendim dhe hipokrizi. Këto përmenden nga një fëmijë oligarku. E ftoj Muçin që tokën që ka në Arameras t’ua falë fëmijëve në nevojë.

Nëse Muçi është i sinqertë dhe na flet për arsimin, në shkollën Koto Hoxhi në Gjirokastër, të kërkojë që godina e familjes së tij të shembet dhe t’i kthehet oborri shkollës. Është zaptuar oborri i shkollës nga ju që flisni për arsim.

Muçi ka shkuar në një tekst të vetin që falë ndihmës së familjes së tij, do të mund ta siguronte jetën si inxhinier ndërtimi. E thënë nga unë që kam punuar edhe kamarier, po i them se nuk është turp ta sigurosh jetën si inxhinier ndërtimi, turp është ta ndërtosh si përdredhës partie”, u shpreh Bido.

Nga ana e tij, Muçi e mohoi akuzën dhe u shpreh se në rast se e konstatoni ndërtim të paligjshëm në në këtë zonë, të njoftohen organet kompetente nga ana e mazhorancës.

“Bido përmendi edhe shkollën Koto Hoxhi, ku unë jam arsimuar dhe kam kaluar fëmijërinë në oborrin e saj. Nëse Bido konstaton shkelje në një shkollë në zonë të mbrojtur, duhet të kontaktojnë organet kompetente. Por nuk e bëjnë, sepse kjo që dëgjuam është salca e radhës për patronazhistët.

Me këtë Bido, çoji mesazh Tao Paralelpipedit, ju jeni mësuar t’i hidhni baltë njëri-tjetrit. Doli edhe kryegjyshi përmendi Aramerasin. Unë nuk jam vetëm, jam një nga 100 mijë protestuesit në shesh dhe balta juaj nuk më bën pis, por më tregon se e kam bërë mirë punën dhe kjo është puna që duhet të bëj”, u shpreh Muçi në replikën e tij.