Nelson Torrealba po kërkon gruan dhe dy djemtë e tij pasi pallati ku jetonin në rajonin bregdetar të La Guairas u shemb gjatë tërmeteve që goditën Venezuelën.

Ai ishte larguar vetëm pak minuta më parë për të blerë ushqime, kur ndjeu lëkundjet e forta të tokës.

Sipas dëshmisë së tij, roja e sigurisë i bërtiti të dilte menjëherë nga makina. Pak çaste më vonë, ndërtesa 11-katëshe “Ritasol Palace” u shemb plotësisht, duke u mbuluar nga një re e dendur pluhuri. Kur pluhuri u shpërnda, Nelsoni pa se nga pallati nuk kishte mbetur pothuajse asgjë.

Në apartamentin e katit të shtatë jetonin bashkëshortja e tij, Dallenyi, dhe dy djemtë, Samueli 14 vjeç dhe Matíasi 10 vjeç. Familja kishte jetuar prej vitesh në atë banesë, e cila ishte e vetmja shtëpi që fëmijët kishin njohur.

Nelsoni e përshkruan jetën në Ritasol Palace si të qetë dhe të lumtur. Kompleksi rezidencial ofronte pishinë, fushë sportive dhe ndodhej pranë plazhit, duke krijuar kushte të mira për jetën familjare. Ai kujton me emocion momentet e përditshme me djemtë e tij, veçanërisht përqafimet e Matíasit, të cilat, sipas tij, i jepnin forcë pas ditëve të vështira.

Duke folur për familjen, Nelsoni e cilëson bashkëshorten si “nënën më të mirë”, ndërsa Samuelin si një djalë të qetë dhe të sjellshëm. Mes lotësh ai shprehet se ëndrra e tyre ishte të rrisnin dy djem me vlera, por kjo u ndërpre tragjikisht nga fatkeqësia.

Banorët e mbijetuar thonë se ndërtesa konsiderohej një nga më të sigurta në zonë dhe askush nuk e kishte imagjinuar se mund të shembej. Tërmetet që goditën Venezuelën shkaktuan dëme të mëdha, ndërsa ekipet e kërkim-shpëtimit vijojnë punën për gjetjen e personave të zhdukur nën rrënoja.