Shqipëria ishte ndër vendet pjesëmarrëse në një nga operacionet më të mëdha ndërkombëtare kundër trafikimit të qenieve njerëzore, të koordinuar nga Europol, me mbështetjen e INTERPOL dhe Frontex.

Operacioni, i koduar “Global Chain”, u zhvillua nga 8 deri më 12 qershor në 59 vende të botës dhe rezultoi në 1,024 arrestime, identifikimin e 2,070 viktimave të mundshme, si dhe nisjen e 465 hetimeve të reja.

Sipas të dhënave të Europolit, nga të arrestuarit, 334 persona dyshohen për trafikim të qenieve njerëzore, ndërsa 690 të tjerë për vepra të tjera penale të lidhura me këtë aktivitet kriminal. Gjithashtu u identifikuan 201 të dyshuar të tjerë dhe 80 raste të mashtrimit me dokumente.

Operacioni u përqendrua në luftën kundër trafikimit për shfrytëzim seksual, punë të detyruar, kriminalitet të detyruar dhe lypje të detyruar, me vëmendje të veçantë ndaj fëmijëve. Nga viktimat e identifikuara, 162 ishin të mitur, ndërsa shumica e viktimave ishin gra të trafikuara për shfrytëzim seksual.

Në aksion morën pjesë mbi 40 mijë efektivë të policisë, rojeve kufitare, inspektorateve të punës dhe autoriteteve doganore, të cilët kontrolluan mbi 565 mijë persona, 360 mijë dokumente identiteti, 140 mijë automjete, më shumë se 20 mijë lokacione dhe mbi 6 mijë fluturime e anije.

Shqipëria ishte pjesë e Qendrës Evropiane të Operacioneve së bashku me 42 shtete të tjera nga Evropa, Azia dhe Afrika, ndërsa koordinimi operacional u zhvillua nga një qendër në Shkup dhe një tjetër në Rio de Janeiro.

Gjatë operacionit u goditën rrjete kriminale në disa shtete, duke çuar në shpëtimin e viktimave të trafikimit seksual dhe të punës së detyruar, sekuestrimin e pasurive dhe parave, si dhe çmontimin e grupeve të përfshira në shfrytëzimin e të miturve.

Europoli theksoi se trafikantët po përdorin gjithnjë e më shumë platformat online dhe rrjetet sociale për të rekrutuar, kontrolluar dhe shfrytëzuar viktimat, ndaj bashkëpunimi ndërkombëtar dhe përdorimi i inteligjencës dixhitale mbeten kyçe në luftën kundër këtij fenomeni.